झाडाच्या फांद्या तोडत असताना खाली कोसळल्याने तरुणाचा दुर्देवी मृत्यू!
जळगाव खान्देश लाईव्ह न्यूज प्रतिनिधी – झाडाच्या फांद्या तोडत असताना अचानक खाली कोसळल्याने गंभीर जखमी झालेल्या नान्या काका पावरा (वय ३०, रा. दहीवद, ता. शिरपुर, ह. मु. म्हसावद, ता. जळगाव) या तरुणाचा मृत्यू झाला. ही घटना शुक्रवार दि. ४ रोजी दुपारी साडेबारा वाजेच्या सुमारास म्हसावद शिवारात घडली. शनिवारी शवविच्छेदन करून मृतदेह नातेवाईकांच्या ताब्यात देण्यात आला.
याबाबत सविस्तर वृत्तांत असे की, जळगाव तालुक्यातील म्हसावद येथे नान्या पावरा हा आपल्या कुटुंबासह वास्तव्याला होता. शेती आणि मजुरीचे काम करून तो आपला उदरनिर्वाह करत होता. नेहमीप्रमाणे शुक्रवार दि. ४ एप्रिल दुपारी १२.३० वाजेच्या सुमारास नान्या पावरा हा म्हसावद शिवारातील शेतात झाडाच्या फांद्या तोडत असताना अचानक तो खाली जमिनीवर कोसळला. यात गंभीर जखमी झाल्याने त्याचा मित्र सुरज पावरा यांनी त्याला तातडीने खाजगी वाहनातून जळगाव येथील शासकीय वैद्यकीय महाविद्यालयात दाखल केले. यावेळी वैद्यकीय अधिकारी यांनी तपासणी करून मयत घोषित केले. दरम्यान या संदर्भात एमआयडीसी पोलीस ठाण्यात अकस्मात मृत्यूची नोंद करण्यात आली. शनिवार दि. ५ एप्रिल रोजी सकाळी १० वाजता शवविच्छेदन करून मृतदेह नातेवाईकांच्या ताब्यात देण्यात आला. पुढील तपास सहाय्यक फौजदार दत्तात्रय बडगुजर आणि पोकॉ नरेंद्र मोरे करीत आहे
