तरुणाला शिवीगाळ करत डोक्यात बियरच्या बाटल्या टाकून केले गंभीर जखमी!
जळगाव खान्देश लाईव्ह न्यूज प्रतिनिधी – शहरातील एमआयडीसीतील हॉटेल सागर जवळ काहीही कारण नसताना एका तरुणाला शिवीगाळ करून डोक्यात बियरच्या बाटल्या टाकून गंभीर दुखापत केल्याची घटना गुरुवार २० मार्च रोजी सायंकाळी ७.३० वाजता घडली आहे. याप्रकरणी रात्री ११ वाजता एमआयडीसी पोलीस ठाण्यात दोन जणांवर गुन्हा दाखल करण्यात आला आहे.
याबाबत मिळालेल्या माहितीनुसार, राहुल कडू पाटील (वय-२१) रा. किनगाव ता. यावल ह.मु. रायपूर ता. जळगाव हा तरुण आपल्या परिवारासह वास्तव्याला आहे. दरम्यान गुरुवारी २० मार्च रोजी सायंकाळी साडेसात वाजता राहुल पाटील हा एमआयडीसीतील हॉटेल सागर जवळून पायी जात असताना रस्त्यावर संशयित आरोपी दिनेश भारत चौधरी आणि ललित महेंद्र पाटील दोन्ही राहणार रामेश्वर कॉलनी जळगाव यांनी त्याचा रस्ता अडून शिवीगाळ केली आणि काहीही कारण नसताना डोक्यात बियरच्या बाटल्या टाकून गंभीर दुखापत केली. दरम्यान या संदर्भात राहुल पाटील यांनी दिलेल्या फिर्यादीवरून एमआयडीसी पोलीस ठाण्यात दोघांवर गुन्हा दाखल करण्यात आला आहे. पुढील तपास पोलीस कॉन्स्टेबल विजय पाटील करीत आहे.
