भुसावळातील महिला भाविकाचा भरधाव कारच्या धडकेत जागीच मृत्यू!
भुसावळ खान्देश लाईव्ह न्यूज प्रतिनिधी – भरधाव कारने धडक दिल्याने भुसावळातील महिला भाविकाचा मृत्यू झाला. हा अपघात गुरुवारी कळवणनजीक घडला. गौरीबाई बटलू पासी (३८) असे मृत महिलेचे नाव आहे. या घटनेने शहरातील पासी वाड्यात हळहळ व्यक्त करण्यात येत आहे.
याबाबत सविस्तर वृत्तांत असे की, गुरुवारी रात्री भुसावळात त्यांच्या पार्थिवावर अंत्यसंस्कार करण्यात आले. याप्रकरणी कळवण पोलिसांत अपघाताची नोंद करण्यात आली आहे.भुसावळ शहरातील पासी वाड्यातील २० ते २२ भाविक सप्तश्रृंगगडाकडे पदयात्रेने निघाले आहेत. गुरुवारी कळवणजवळ आले असता एका भरधाव कारने गौरीबाई यांना जबर धडक दिली यात त्यांचा जागीच मृत्यू झाला. त्यांना तत्काळ कळवण येथील शासकीय रुग्णालयात नेण्यात आले. डॉक्टरांनी तपासून मृत घोषित केले. कळवण येथे शवविच्छेदन करण्यात आले. गुरुवारी रात्री भुसावळात त्यांच्यावर अंत्यसंस्कार करण्यात आले. गौरीबाई पासी यांच्या पश्चात पती, तीन मुली, मुलगा असा परिवार आहे.
आठवडे बाजारात त्या खाद्यपदार्थ विक्रीचा व्यवसाय करून परिवाराचे पालनपोषण करीत होत्या. याप्रकरणी कळवण पोलिसांत कारचालकाविरुद्ध गुन्हा दाखल करून त्यास अटक करण्यात आली आहे.
