लाचखोरांमध्ये खळबळ : २० हजारांची लाच घेताना अधिकारी अटकेत
भुसावळ खान्देश लाईव्ह न्यूज प्रतिनिधी – शासकीय विद्युत कामे करणाऱ्या ठेकेदाराच्या कामाचा प्रस्ताव वरिष्ठांकडे सादर करण्यासाठी तडजोडीअंती २० हजारांची लाच मागून ती कार्यालयात स्वीकारताना चोरवड वीज वितरण कंपनीचे उपकार्यकारी अभियंता प्रशांत प्रभाकर इंगळे (वय ४६) याला बुधवारी सायंकाळी जळगाव एसीबीने अटक केल्याने लाचखोरांमध्ये खळबळ उडाली आहे.
याबाबत सविस्तर वृत्तांत असे की, भुसावळातील ४९ वर्षीय तक्रारदार हे शासकीय विद्युत ठेकेदार आहेत. त्यांनी एका खासगी कंपनीचे एनएससी स्किम अंतर्गत नवीन सर्व्हिस कनेक्शनची क्षमतावाढ १०० वॅटहून २०० वॅट करण्याचा प्रस्ताव प्रशांत इंगळे यांच्याकडे दिला होता. मात्र, हा प्रस्ताव कार्यकारी अभियंता यांना पाठवण्यासाठी प्रलंबित होता. हा प्रस्ताव पाठवण्यासाठी इंगळे यांनी २२ रोजी तक्रारदार यांच्याकडे २५ हजार रुपये लाच मागितल्यानंतर एसीबीकडे तक्रार नोंदवून पडताळणी करण्यात आली. तर तडजोडीअंती २० हजार रुपये लाच स्वीकारण्याचे इंगळे यांनी मान्य केले. त्यानंतर चोरवड कार्यालयातच त्यांना लाच स्वीकारताच अटक करण्यात आली. या प्रकरणी भुसावळ तालुका पोलीस ठाण्यात प्रशांत इंगळे याच्याविरोधात गुन्हा दाखल करण्यात आला. ही कारवाई पोलीस अधीक्षक शर्मिष्ठा घारगे वालावलकर यांच्या मार्गदर्शनाखाली जळगाव एसीबीचे पोलीस उपअधीक्षक योगेश ठाकूर, पोलीस निरीक्षक स्मिता नवघरे, नाईक बाळू मराठे, अमोल सूर्यवंशी यांच्या पथकाने केली.
