वाळू माफियांकडून दहशत पसरविण्यासाठी हवेत केला गोळीबार ; ९ जणांविरुद्ध गुन्हा दाखल!
धरणगाव खान्देश लाईव्ह न्यूज प्रतिनिधी – जळगाव जिल्ह्यातील अनेक ठिकाणी छोट्या मोठ्या कारणाने वाळूमाफियामध्ये राडा होत असल्याच्या घटना सातत्याने घडत असतांना नुकतेच धरणगाव तालुक्यातील चांदसर येथे गिरणा नदीच्या पात्रातून वाळूचा अवैध उपसा करीत असताना कोतवालाने फोटो काढले. त्यावर वाळूमाफियाने हवेत गोळीबार करून दहशत पसरवली.
याबाबत सविस्तर वृत्तांत असे की, याप्रकरणी नऊजणांविरुद्ध गुन्हा दाखल करण्यात आला आहे. चांदसर गावातील नदीपात्रातून वाळू उपसा होत होता. तो रोखण्यासाठी गावाबाहेर चाऱ्या खोदून रस्ता बंद करण्यात आला आहे. त्यामुळे अवैध वाळू उपसा बंद होता. अवैध वाळू उपसा करण्यासाठी वाक टुकी येथील काहीजण चाऱ्या बुजवत होते. याबाबत कोतवाल अमोल गुलाब मालचे यांना समजले. त्यांनी तेथे जाऊन त्यांना त्याचा जाब विचारला. याचा राग येऊन वाळू माफियांनी शिवीगाळ करून जिवे मारण्याची धमकी दिली. याच वेळी गोपाल कोळी यांनी त्यांच्याजवळील पिस्तूल काढून हवेत गोळीबार केला. यावेळी तेथे एकच खळबळ उडाली, तर गावात त्याचा आवाज झाल्याने तेथेही धावपळ उडाली. हवेत गोळीबार केल्यानंतर ते पळून गेले. माहिती कळताच पाळधी पोलिस गावात पोहोचले.सदर ही घटना चांदसर (ता. धरणगाव, जि. जळगाव) येथे मंगळवारी दुपारी चार वाजण्याच्या सुमारास घडली. योगेश ईश्वर कोळी, आबा ईश्वर कोळी, गणेश सोमा कोळी, मोहन गोविंदा कोळी, कल्पेश महेश पाटील, राहुल भीमराव कोळी, राहुल दिलीप कोळी (सर्व रा. चांदसर, ता. धरणगाव) तसेच गोपाल कोळी, दीपक कोळी (दोन्ही रा. वाकटुकी, ता. धरणगाव) अशी गुन्हा दाखल झालेल्यांची नावे आहेत. कोतवाल अमोल मालचे यांनी दिलेल्या फिर्यादीवरून वरील व्यक्तींविरुद्ध गुन्हा दाखल करण्यात आला आहे.
दरम्यान, तपास सपोनि प्रशांत कंडारे, मधुकर उंबरे व सहकारी करीत आहेत. घटनास्थळी चोपडा भागाचे पोलिस उपविभागीय अधिकारी घोलप, पो. नि. पवन देसले यांनी भेट दिली. संशयितांच्या शोधासाठी पोलिसांची पथके रवाना करण्यात आली आहेत.
