शेतात एकटी असल्याचा फायदा घेत १५ वर्षीय अल्पवयीन मुलीचा विनयभंग !
जळगाव खान्देश लाईव्ह न्यूज प्रतिनिधी – शेतात एकटी असल्याचा फायदा घेत एका तरूणाने १५ वर्षीय अल्पवयीन मुलीचा विनयभंग केला. ही घटना रविवार दि. २३ फेब्रुवारी रोजी दुपारी १ वाजता एमआयडीसी पोलीस ठाण्याच्या हद्दीत घडली. याप्रकरणी एमआयडीसी पोलीस ठाण्यात संशयित आनंदा उर्फ भैया वाणी रा. दापोरा याच्याविरुद्ध गुन्हा दाखल करण्यात आला असून संशयित आरोपीला अटक करण्यात आली आहे.
याबाबत सविस्तर वृत्तांत असे की, तालुक्यातील एका गावातील एका शेतात १५ वर्षीय अल्पवयीन मुलगी आपल्या परिवारासह वास्तव्याला आहे. रविवार दि. २३ फेब्रुवारी रोजी दुपारी १ वाजता पिडीत मुलगी ही घरी एकटी असतांना संशयित आरोपी आनंदा वाणी याने अल्पवयीन मुलीचा हात पकडून तोंड दाबून तिचा विनयभंग केला आहे. हा प्रकार पिडीत मुलीने नातेवाईकांना सांगितला. त्यानंतर पिडीत मुलीने एमआयडीसी पोलीस ठाण्यात धाव घेवून तक्रार दिली. त्यानुसार संशयित आरोपी आनंदा उर्फ भैया वाणी रा. दापोरा जि. जळगाव याच्या विरोधात एमआयडीसी पोलीस ठाण्यात रात्री गुन्हा दाखल करण्यात आला. पोलीसांनी गुन्हा दाखल करताच संशयित आरोपीस अटक केली आहे. तपास सपोनि माधुरी बोरसे ह्या करीत आहे.
