महाराष्ट्र पोलीस महिला समितीच्या सदस्यपदी सुनीता महाडिक समाजकार्य व पत्रकारितेची दखल
<img class
चाळीसगाव : खानदेश लाईव्ह न्युज प्रतिनिधी समाजसेवा आणि पत्रकारिता क्षेत्रात सातत्याने कार्यरत असलेल्या समाजरत्न पुरस्काराने सन्मानित समाजसेविका तथा Live नवं विचार Newsच्या मुख्य संपादक सौ. सुनीता राजेंद्र महाडिक यांची महाराष्ट्र पोलीस महिला समिती, चाळीसगाव पोलीस स्टेशन सदस्यपदी निवड करण्यात आली आहे. त्यांच्या सामाजिक बांधिलकी, लोकहिताची पत्रकारिता आणि जनसंपर्कातील उल्लेखनीय कार्याची दखल घेत पोलीस प्रशासनाने त्यांच्यावर ही जबाबदारी सोपविली आहे.ही निवड पोलीस उपविभागीय अधिकारी विजयकुमार ठाकुरवाड, पोलीस निरीक्षक अमित कुमार मनेळ आणि उपपोलीस निरीक्षक संदीप घुले यांच्या मार्गदर्शनाखाली करण्यात आली. समाजाशी सातत्याने संवाद ठेवणाऱ्या, महिलांच्या प्रश्नांबाबत संवेदनशील भूमिका घेणाऱ्या आणि लोकाभिमुख कार्य करणाऱ्या व्यक्तींना समितीत संधी देण्याच्या धोरणानुसार सौ. महाडिक यांची निवड करण्यात आल्याचे सांगण्यात आले.महिला सुरक्षा, कायदेविषयक जनजागृती, नागरिक व पोलीस यांच्यातील विश्वास दृढ करणे तसेच सामाजिक समन्वय वाढविणे या उद्देशाने महाराष्ट्र पोलीस महिला समिती कार्यरत आहे. अशा महत्त्वाच्या समितीत सौ. महाडिक यांचा समावेश झाल्याने त्यांच्या कार्याला मिळालेली ही मोठी पोचपावती मानली जात आहे.पोलीस उपविभागीय अधिकारी विजयकुमार ठाकुरवाड यांनी चाळीसगाव उपविभागात लोकाभिमुख प्रशासन, शिस्तबद्ध कामकाज आणि सामाजिक सहभागाला प्राधान्य दिले असून महिला सुरक्षा व सामाजिक सलोखा मजबूत करण्यासाठी विविध उपक्रम राबविले आहेत. समाजातील विश्वासार्ह आणि सक्रिय व्यक्तींना महिला समितीत स्थान देण्यामागे पोलीस-जनता संवाद अधिक प्रभावी करण्याचा उद्देश असल्याचे त्यांनी स्पष्ट केले.पोलीस निरीक्षक अमित कुमार मनेळ यांनीही नागरिकांशी सुसंवाद, तक्रारींचे तातडीने निराकरण आणि कायद्याची प्रभावी अंमलबजावणी यावर भर देत महिला समिती अधिक सक्षम करण्यासाठी पुढाकार घेतला आहे. सौ. महाडिक यांच्या पत्रकारिता व समाजसेवेतील योगदानामुळे त्या समितीच्या माध्यमातून महिला सक्षमीकरणासाठी प्रभावी काम करतील, असा विश्वास त्यांनी व्यक्त केला.उपपोलीस निरीक्षक संदीप घुले यांनी समितीच्या निवड प्रक्रियेत समन्वयाची महत्त्वपूर्ण भूमिका बजावत समाजाभिमुख व्यक्तींना संधी देण्यावर भर दिला. सौ. महाडिक यांचा अनुभव समितीच्या कार्याला निश्चितच बळ देईल, असा विश्वासही त्यांनी व्यक्त केला.सौ. सुनीता महाडिक या Live नवं विचार Newsच्या मुख्य संपादक असून पत्रकारिता आणि समाजसेवा या दोन्ही क्षेत्रांत सक्रिय आहेत. विविध पत्रकार संघटना आणि सामाजिक संस्थांमध्ये त्यांनी महत्त्वपूर्ण जबाबदाऱ्या सांभाळल्या आहेत. समाजरत्न पुरस्कारासह विविध सन्मानांनी त्यांना गौरविण्यात आले असून महिलांचे प्रश्न, सामाजिक जनजागृती आणि लोकहिताच्या विषयांवर त्यांनी सातत्याने प्रभावी भूमिका मांडली आहे.त्यांच्या या निवडीचे चाळीसगावसह जळगाव जिल्ह्यातील पत्रकार, सामाजिक कार्यकर्ते आणि विविध क्षेत्रातील मान्यवरांनी स्वागत केले असून पुढील वाटचालीस शुभेच्छांचा वर्षाव होत आहे.
