पाल-सहस्त्रलिंग रस्त्यावर बिबट्याचा थरार
प्रवाश्यांचा अनुभवला थरकाप
पाल रावेर खानदेश लाईव्ह न्युज प्रतिनिधी
शुक्रवारी मध्यरात्री साधारण बाराच्या सुमारास सहस्त्रलिंग ते पाल गावदरम्यानच्या एंकळझिरा परिसरात वाहनाने प्रवास करणाऱ्या प्रवाशांना अंगावर काटा आणणारा अनुभव आला. अचानक रस्त्यावर बिबट्या उभा दिसल्याने पाहून क्षणभर गाडीतील सर्व प्रवासी थिजून गेले.
गाडीच्या हेडलाईटच्या तेजस्वी प्रकाशात बिबट्याचे चमचमणारे डोळे स्पष्ट दिसत होते. वाहनचालकाने तत्काळ गाडी थांबवली. सुमारे पाच मिनिटे बिबट्या रस्त्यावर इकडे-तिकडे फेरफटका मारत राहिला आणि मग निवांतपणे जंगलाच्या दिशेने गेला.
या दरम्यान वाहनातील प्रवाशांनी संपूर्ण प्रसंग मोबाईलमध्ये टिपला. काही वेळातच हा व्हिडिओ सोशल मीडियावर व्हायरल झाला आणि परिसरात चर्चेला उधाण आले.
या घटनेमुळे पुन्हा एकदा सातपुड्याच्या जंगलातील वन्यजीवांची उपस्थिती असल्याचे अधोरेखित झाले आहे. पावसाळ्यात डोंगरकपारींमध्ये पाणी व अन्न मुबलक प्रमाणात उपलब्ध असल्याने प्राणी मुक्तपणे वावरतात.
विशेषतः बिबट्यासारखे प्राणी अन्नाच्या शोधात अनेकदा रस्त्यावर येतात. मात्र ते शक्यतो माणसांवर हल्ला करत नाहीत, जोपर्यंत त्यांना कुणी त्रास देत नाही.
शुक्रवारी मध्यरात्री घडलेली ही घटना प्रवाशांसाठी भीती आणि थरार दोन्ही घेऊन आली. हा प्रसंग एका बाजूला रोमांचकारी होता, तर दुसऱ्या बाजूला निसर्ग आणि वन्यजीव यांच्याबद्दल आदरभाव निर्माण करणारा ठरला. अशा घटनांमधून स्पष्ट संदेश मिळतो की जंगल व त्यातील प्राणी हे निसर्गाचे अविभाज्य घटक आहेत. आपण त्यांच्या आवासात प्रवेश करतो, त्यामुळे त्यांचा सन्मान राखणे व पर्यावरण संवर्धनाची जबाबदारी आपलीच आहे.
या भागातून प्रवासी आणि नागरिकांनी रात्री एकटे प्रवास टाळावा. प्राणी दिसल्यास घाबरू नका, शांत राहा. हॉर्न वा दगड मारू नका, त्याला मार्ग द्या. लहान मुले, वृद्ध यांना रात्री एकटे सोडू नका. शेती कामे समूहाने करा व उघड्यावर शौचास जाणे टाळा असे आवाहन
– स्वप्निल फटांगरे, वनपरिक्षेत्र अधिकारी रावेर यांनी केले आहे .
