भुसावळात दारूच्या दुकानात दोन मदयपीचा धुडगुस
दुकान मालक व कामगारास मारहाण
भुसावळ खान्देश लाईव्ह न्यूज प्रतिनिधी – शहरातील मानसिंग कॉम्प्लेक्समधील मधुर वाईन शॉप मध्ये दोन मद्यपी तरुणांनी गोंधळ घालत दारूचे पैसे देण्यास नकार देत दुकान मालक व कामगारांना मारहाण केल्याची घटना रविवारी घडली आहे .
तसेच काउंटरवर ठेवलेली तब्बल दोन हजार दोनशे रुपयांची रोकड जबरीने हिसकावून हे दोघे पसार झाले.
या घटनेबाबत बाजारपेठ पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, रविवारी रात्री एक काळा शर्ट घातलेला तरुण दुकानात येऊन दोन क्वार्टरची मागणी करत होता. कामगारांनी दारू दिल्यानंतर त्यास पैसे मागितल्यावर संतापून शिवीगाळ व आरडाओरड सुरू केली. त्यानंतर त्याचा दुसरा साथीदार (पिवळ्या शर्टात) देखील दुकानात दाखल होऊन गोंधळ घालू लागला.
“तू हमको नही पहचानता क्या? किसी को भी रितिक नाम से पूछ लेना” असे म्हणत त्यांनी धमक्या दिल्या. त्यापैकी एकाने दुकान मालक पंकज जंगले यांच्यावर बाटली फेकून हल्ल्याचा प्रयत्न केला तर दुसऱ्याने कामगारांस धक्काबुक्की केली. यात मालक पंकज जंगले यांच्या हाताला गंभीर इजा झाली आहे.
घटनेदरम्यान काउंटरवरील रोकड २२०० रुपये हिसकावून दोघे मद्यपी पळून गेले.
हा संपूर्ण प्रकार सीसीटीव्हीत कैद झाला असून फुटेजच्या आधारे पोलिसांनी आरोपींचा शोध सुरू केला आहे.
या प्रकरणी मधुर वाईनचे मालक पंकज घनश्याम जंगले (वय ४५, रा. आदर्श नगर, जळगाव) यांच्या फिर्यादीवरून बापारपेठ पोलिस ठाण्यात दोघा अज्ञातांविरुद्ध गुन्हा दाखल करण्यात आला आहे. पुढील तपास पोलीस उपनिरीक्षक मंगेश जाधव करीत आहेत.
