राजमाता जिजाऊ एसटी बस लोकार्पणाच्या नियोजनावरून यावल आगारात राजकीय वाद; ठाकरे गट आक्रमक, आगारप्रमुखांनी व्यक्त केली दिलगिरी.
यावल खानदेश लाईव्ह न्युज प्रतिनिधी दि.२४
राजमाता जिजाऊ एसटी बसेसच्या लोकार्पण कार्यक्रमाच्या नियोजनावरून यावल आगारात राजकीय वातावरण चांगलेच तापल्याचे चित्र पाहायला मिळाले. कार्यक्रमाचे नियोजन पक्षपातीपणाने करण्यात आल्याचा आरोप करीत शिवसेना ठाकरे गटाच्या पदाधिकारी व कार्यकर्त्यांनी यावल आगारप्रमुख इमरान पठाण यांना त्यांच्या कार्यालयात धारेवर धरले.
या संपूर्ण प्रकाराचे व्हिडिओ शूटिंग समोर आले असून, कार्यक्रमाच्या नियोजनाबाबत
हकीम शेठ शहराध्यक्ष काँग्रेस, करीम मन्यार,उमर कच्ची, मजहर मेंबर,समीर मेंबर,फारुख हाजी,तालुकाप्रमुख शिवसेना,
शरदभाऊ कोळी,शहर प्रमुख जगदीशशेठ कवडी वाले, शिवसेना माजी तालुकाध्यक्ष कडूदादा पाटील,संतोष खर्चे, पप्पू जोशी,योगेश पाटील,सारंग बेहेडे,भूषण खैरे,किशोर माळी,वैभव दांडेकर,विकी लोणारी यांनी आगारप्रमुखांकडे तीव्र शब्दांत नाराजी व्यक्त केल्याचे दिसून येत आहे.बॅनरवर नेत्यांची नावे व छायाचित्र नसल्याने संताप व्यक्त केला.
राजमाता जिजाऊ एसटी बसेसच्या उद्घाटन कार्यक्रमासाठी लावण्यात आलेल्या बॅनरवर शिंदे गटाचे परिवहन मंत्री प्रताप सरनाईक तसेच चोपडा-यावल मतदारसंघाचे आमदार प्रा. चंद्रकांत सोनवणे यांचे नाव व छायाचित्र न घेण्यात आल्याने हा वाद निर्माण झाला.विशेष म्हणजे, राज्यातील सत्ताधारी पक्षाचे नेते आणि एसटी महामंडळाशी संबंधित परिवहन मंत्र्यांचे नाव व छायाचित्र वगळण्यात आल्याबद्दल ठाकरे गटाच्या पदाधिकाऱ्यांनी प्रश्न उपस्थित केले.
या कार्यक्रमाचे नियोजन जाणीवपूर्वक किंवा निष्काळजीपणामुळे पक्षपाती पद्धतीने करण्यात आले का, असा सवाल उपस्थित करीत शिवसेना ठाकरे गटाच्या पदाधिकारी व कार्यकर्त्यांनी आगारप्रमुखांच्या कार्यालयात जाऊन आक्रमक भूमिका घेतली.
आगारप्रमुखांना कार्यालयात धारेवर धरले
शिवसेना ठाकरे गटाच्या पदाधिकारी व कार्यकर्त्यांनी आगारप्रमुख इमरान पठाण यांच्याकडे संबंधित बॅनर आणि कार्यक्रमाच्या नियोजनाबाबत जाब विचारला. “राजकीय व्यक्तींना डावलून, काहींना प्राधान्य देण्याचे काम कोणी आणि कोणाच्या आदेशाने केले?” असा सवाल उपस्थित करण्यात आला.
या वेळी वातावरण काही काळ तणावपूर्ण झाले होते. ठाकरे गटाच्या पदाधिकाऱ्यांनी संबंधित प्रकाराबाबत तीव्र नाराजी व्यक्त करत आगार प्रशासनाच्या नियोजनावर प्रश्नचिन्ह उपस्थित केले.
उपस्थित शिंदे शिवसेना पदाधिकारी मात्र गप्प
दरम्यान, या संपूर्ण कार्यक्रमात शिंदे शिवसेनेचे काही पदाधिकारी उपस्थित असतानाही बॅनरवर त्यांच्या पक्षाचे परिवहन मंत्री प्रताप सरनाईक आणि आमदार प्रा. चंद्रकांत सोनवणे यांचे नाव व छायाचित्र नसल्याबाबत त्यांनी तत्काळ आक्षेप नोंदविला नसल्याची चर्चा सुरू आहे.
यामुळे एसटीच्या शासकीय कार्यक्रमात स्थानिक पातळीवरील राजकीय समन्वयाचा अभाव दिसून आल्याचीही चर्चा रंगली आहे.
आगारप्रमुखांची दिलगिरी
शिवसेना ठाकरे गटाच्या आक्रमक भूमिकेनंतर यावल आगारप्रमुख इमरान पठाण यांनी या प्रकाराबाबत दिलगिरी व्यक्त केली. त्यामुळे काही काळ तणावपूर्ण झालेल्या वातावरणात शांतता निर्माण झाली.
मात्र, एसटी महामंडळाच्या महत्त्वाच्या कार्यक्रमाच्या नियोजनात झालेल्या या प्रकारामुळे प्रशासनाच्या कार्यपद्धतीवर प्रश्न उपस्थित झाले आहेत. भविष्यात अशा शासकीय व सार्वजनिक कार्यक्रमांचे नियोजन करताना सर्व संबंधित लोकप्रतिनिधी, प्रशासन आणि पक्षीय पदाधिकाऱ्यांमध्ये योग्य समन्वय ठेवण्यात येणार का, याकडे आता सर्वांचे लक्ष लागले आहे.
व्हिडिओमुळे प्रकरणाला नवे वळण
या संपूर्ण घटनेचे व्हिडिओ शूटिंग उपलब्ध असल्याने यावल आगारातील हा राजकीय वाद आणखी चर्चेचा विषय बनला आहे. बॅनरवरील नाव-छायाचित्र वगळण्यामागे नेमकी कोणाची चूक होती, तसेच कार्यक्रमाचे नियोजन कोणाच्या मार्गदर्शनाखाली करण्यात आले, याबाबत आता विविध राजकीय वर्तुळांत चर्चा सुरू झाली आहे.
एकीकडे राजमाता जिजाऊ एसटी बसेसच्या लोकार्पणाचा आनंदोत्सव, तर दुसरीकडे बॅनर आणि नियोजनाच्या मुद्द्यावरून राजकीय आरोप-प्रत्यारोप—यामुळे यावल आगारातील हा कार्यक्रम चांगलाच गाजला.
आगार प्रमुख इम्रान पठाण यांनी फक्त आमदार जावळे यांना आमंत्रण दिले होते. मग इतर पदाधिकारी कार्यकर्ते मोठ्या संख्येने आणि प्रभावाने कोणाच्या आमंत्रणाने उपस्थित राहिले, इतर पदाधिकारी कार्यकर्त्यांना यावल आगारातून कोणत्या कर्मचाऱ्यांने आमंत्रण दिले होते का.? त्या कर्मचाऱ्याने पक्षपातीपणा कोणाच्या सूचनेनुसार केला.? असा सुद्धा प्रश्न उपस्थित होत आहे. आमदार चंद्रकांत सोनवणे यांच्या कार्यक्षेत्रातील शिंदे गटाचा एक जबाबदार जिल्हास्तरावरील पदाधिकारी उपस्थित असताना ( त्यांचे वरिष्ठ परिवहन मंत्री आणि आमदार सोनवणे यांचे छायाचित्र नसताना ) तो का गप्प बसला.? याबाबत सुद्धा अनेक प्रश्न उपस्थित केले जात आहे.
