सुसाट निघालेल्या डंपरची आकाशवाणी ते अजिंठा चौक दरम्यान ५ वाहनांना जोरदार धडक; एक जण जखमी
जळगाव खानदेश लाईव्ह न्युज प्रतिनिधी शहरातील आकाशवाणी ते अजिंठा चौक मार्गावर शनिवारी ११ ऑक्टोबर रोजी दुपारी १२ वाजण्याच्या सुमारास एका भरधाव डंपरने रस्त्यावरून जात असलेल्या पाच वाहनांना जोरदार धडक दिली. या भीषण अपघातात पाचही वाहनांचे मोठे नुकसान झाले असून, एका वाहनावरील चालक गंभीर जखमी झाला आहे.
मिळालेल्या माहितीनुसार, शनिवारी ११ ऑक्टोबर रोजी दुपारी १२ वाजण्याच्या सुमारास पाळधीकडून भुसावळच्या दिशेने एक भरधाव डंपर येत होता. जळगाव शहरातील आकाशवाणी ते अजिंठा चौक दरम्यान असलेल्या नायरा पेट्रोल पंपाजवळ डंपर चालकाचे वाहनावरील नियंत्रण सुटले आणि तो पुढे जात असलेल्या वाहनांवर आदळला.
डंपरची धडक इतकी जोरदार होती की, यामध्ये पाच वेगवेगळ्या वाहनांचे मोठे नुकसान झाले. या वाहनांमध्ये एका कारसह अनेक पिकअप वाहनांचा समावेश आहे. या अपघातामुळे घटनास्थळी मोठा गोंधळ निर्माण झाला आणि काही काळ वाहतूक कोंडी झाली होती.
या अपघातात एका पिकअप वाहनाचा चालक जखमी झाला आहे. त्याला तातडीने जवळच्या शासकीय रुग्णालयात उपचारासाठी दाखल करण्यात आले असून, त्याची प्रकृती सध्या स्थिर असल्याचे सांगण्यात येत आहे.
अपघाताची माहिती मिळताच परिसरातील नागरिकांनी मदतीसाठी धाव घेतली. अपघातग्रस्त वाहने रस्त्याच्या कडेला हटवण्यासाठी आणि वाहतूक सुरळीत करण्यासाठी नागरिकांनी मदत केली. भरधाव आणि अनियंत्रित डंपरमुळेच ही दुर्घटना घडल्याचे प्रत्यक्षदर्शींनी सांगितले.
