जय मातृभूमी सार्वजनिक गणेशोत्सव मंडळातर्फे जगन्नाथ पुरीची आकर्षक आरास
पर्यावरणपूरक गवतापासून साकारला भव्य देखावा; ५० ते ६० कारागिरांचे अहोरात्र परिश्रम
भुसावळ खानदेश लाईव्ह न्युज प्रतिनिधी गणेशोत्सवाच्या पार्श्वभूमीवर भुसावळ शहरातील मातृभूमी चौक येथील जय मातृभूमी सार्वजनिक गणेशोत्सव मंडळातर्फे यंदा भाविकांसाठी धार्मिक आणि सांस्कृतिक महत्त्व असलेली आकर्षक आरास साकारण्यात आली आहे. यावर्षी मंडळाने जगन्नाथ पुरी येथील प्रसिद्ध जगन्नाथ मंदिराच्या संकल्पनेवर आधारित भव्य आरास उभारली असून, ही आरास शहरवासीयांसह गणेशभक्तांचे लक्ष वेधून घेत आहे.
पर्यावरणपूरक पद्धतीने साकारण्यात आलेल्या या आरासेसाठी गवताचा मोठ्या प्रमाणावर वापर करण्यात आला आहे. पारंपरिक साहित्याचा वापर करत धार्मिक वास्तूची भव्यता आणि कलात्मकता जपण्याचा प्रयत्न मंडळाच्या वतीने करण्यात आला आहे. आरास उभारण्यासाठी बाहेरून आलेल्या सुमारे ५० ते ६० कारागिरांनी अहोरात्र परिश्रम घेत देखावा पूर्णत्वास नेला आहे.
जगन्नाथ पुरी हे भगवान जगन्नाथाच्या भक्तीचे आणि धार्मिक परंपरेचे महत्त्वाचे केंद्र मानले जाते. त्याच धार्मिक वातावरणाची अनुभूती भुसावळकरांना गणेशोत्सवाच्या निमित्ताने मिळावी, या उद्देशाने मंडळाने यंदाची आरास साकारली आहे. आरासेतील बारकावे, रचना आणि गवताचा कलात्मक वापर यामुळे हा देखावा विशेष आकर्षणाचा केंद्रबिंदू ठरत आहे.
गणेशोत्सव काळात शहरातील विविध भागांतून भाविक मातृभूमी चौकात येऊन या आकर्षक आरासेसह श्रीगणेशाचे दर्शन घेत आहेत. मंडळाच्या कार्यकर्त्यांकडून भाविकांच्या सोयीसाठी आवश्यक नियोजन करण्यात आले असून, गणेशोत्सव उत्साहात आणि भक्तिमय वातावरणात साजरा करण्यावर भर देण्यात आला आहे.
दरम्यान, गणेशोत्सवाच्या माध्यमातून धार्मिक श्रद्धेसोबतच पर्यावरण संवर्धनाचा संदेश देण्याचा प्रयत्न मंडळाने केला आहे. पर्यावरणपूरक साहित्याचा वापर करून साकारलेली ही आरास शहरातील नागरिकांसाठी यंदाच्या गणेशोत्सवातील विशेष आकर्षण ठरत आहे.
जय मातृभूमी सार्वजनिक गणेशोत्सव मंडळाचे अध्यक्ष किरण कोलते यांनी भुसावळकर व गणेशभक्तांनी यंदाच्या गणेशोत्सवाला आवर्जून भेट देऊन जगन्नाथ पुरीच्या आरासेचा आणि श्रीगणेशाच्या दर्शनाचा लाभ घ्यावा, असे आवाहन केले आहे.
