वडतालधाम शिकागो येथे भव्य गणेशोत्सव उत्साहात संपन्न

वडतालधाम शिकागो येथे भव्य गणेशोत्सव उत्साहात संपन्न

फैजपूर : खान्देश लाईव्ह प्रतिनिधी

अमेरिकेतील शिकागोच्या पॅलेटाईन शहरात असलेल्या श्री स्वामिनारायण मंदिर वडतालधाम येथे भक्ती, श्रद्धा आणि उत्साहपूर्ण वातावरणात आयोजित करण्यात आलेल्या भव्य गणेशोत्सवाची सांगता करण्यात आली. गणेशोत्सवाच्या अंतिम दिवशी, रविवारी आयोजित गणेश विसर्जन सोहळ्यात मोठ्या संख्येने हरिभक्त तसेच विविध भारतीय समाजातील भाविक सहभागी झाले होते.
गणेशोत्सवादरम्यान मंदिर परिसर भक्तिमय वातावरणाने भारून गेला होता. अंतिम दिवशी गुजराती, मराठी, पंजाबी आणि राजस्थानी समाजातील भाविकांच्या मोठ्या उपस्थितीत श्री गणेशजींची पूजा-अर्चना, आरती आणि विविध भक्तिमय कार्यक्रम संपन्न झाले. त्यानंतर श्री गणेशजींच्या मूर्तीची भक्तिभावाने आणि जल्लोषात विसर्जनासाठी मिरवणूक काढण्यात आली.

या पावन प्रसंगी चुरम्याच्या लाडूंचा भव्य अन्नकूट भगवान श्री गणेशजींना भावपूर्वक अर्पण करण्यात आला. अन्नकूट दर्शनासाठी भाविकांमध्ये विशेष उत्साह दिसून आला.
या संपूर्ण धार्मिक महोत्सवाला प.पू. ध.धु. 1008 आचार्य श्री राकेशप्रसादजी महाराजश्री, गुरुवर्य स.गु. शा. श्री धर्मप्रसाददासजी स्वामी आणि स.गु. शा. श्री भक्तिप्रकाशदासजी स्वामी यांचे आशीर्वाद लाभले.
महोत्सवाचे आयोजन व व्यवस्थापन शास्त्री श्री धर्मप्रकाशदासजी तसेच युवा कमिटीच्या सदस्यांनी केले. युवा कार्यकर्त्यांच्या सक्रिय सहभागामुळे संपूर्ण उत्सव शिस्तबद्ध आणि भक्तिमय वातावरणात यशस्वीपणे संपन्न झाला.
गणेश विसर्जनाच्या या सोहळ्यात विविध प्रांत आणि

समाजातील भाविकांनी एकत्र येऊन भारतीय संस्कृती, परंपरा आणि धार्मिक एकतेचे सुंदर दर्शन घडविले. भाविकांनी श्री गणेशजींना भावपूर्ण निरोप देत सर्वांच्या सुख, शांती, समृद्धी आणि कल्याणासाठी प्रार्थना केली.
कार्यक्रमाच्या शेवटी सर्व भाविकांनी महाप्रसादाचा लाभ घेतला आणि आनंदाने निरोप घेतला.भक्तीमय वातावरण, भव्य अन्नकूट आणि महाप्रसादासह गणेशोत्सवाची भावपूर्ण आणि भव्य सांगता झाली.