दीपनगरमध्ये राख वाटप धोरणाविरोधात विट व्यापाऱ्यांचे प्रवेशद्वारावर घोषणाबाजीसह आंदोलन!
१६ ऑक्टोबरपासून उपोषणाचा इशारा
भुसावळ खानदेश लाईव्ह न्युज प्रतिनिधी जिल्ह्यातील दीपनगर येथील महानिर्मिती औष्णिक वीज केंद्राच्या राख वाटप धोरणाविरोधात स्थानिक विट व्यापाऱ्यांनी आंदोलन सुरू केले आहे. वीज केंद्राच्या मुख्य प्रवेशद्वारावर आंदोलन करताना व्यापाऱ्यांनी घोषणाबाजी केली आणि ऑनलाइन ई-लिलाव प्रक्रिया रद्द करण्याची मागणी केली.
आंदोलकांचे म्हणणे आहे की, राखेच्या वाढत्या किमतींमुळे विट उत्पादनाचा खर्च वाढत असून, स्थानिक लहान उद्योजकांसाठी आर्थिक संकट निर्माण होत आहे. लहान व्यवसायांना मोठ्या कंपन्यांशी स्पर्धा करणे कठीण होत आहे.
व्यापाऱ्यांनी मागणी केली आहे की, सध्याची एच१ ऑनलाइन ई-लिलाव प्रणाली रद्द करावी आणि स्थानिक उद्योजकांना पारदर्शक व वाजवी दरात राख उपलब्ध करून द्यावी. याव्यतिरिक्त, समान संधी सुनिश्चित करण्यासाठी ऑफलाइन राख वाटप प्रणाली लागू केली पाहिजे.
आंदोलकांच्या मते, २०२६ च्या सरकारी निर्णयानुसार प्रत्येक गटाला दरमहा केवळ ५० मेट्रिक टन राखेचा कोटा निश्चित करण्यात आला आहे. हा कोटा अपुरा असल्याचे सांगत, व्यावसायिकांनी कोट्यात वाढ करण्याची आणि सध्याची ई-लिलाव प्रक्रिया तात्काळ थांबवण्याची मागणी केली आहे.
व्यावसायिकांचे म्हणणे आहे की, अनेकांनी विट उद्योगासाठी बँकांकडून कर्ज घेतले आहे. राखेची कमतरता आणि वाढत्या किमतींमुळे हा उद्योग बंद पडू शकतो. असे झाल्यास, या उद्योगातील कामगारांच्या रोजगारावर आणि त्यांच्या कुटुंबांच्या उपजीविकेवर परिणाम होईल.
१५ ऑक्टोबरपर्यंत निर्णयाची मागणी
या प्रकरणी महानिर्मिती प्रशासनाला एक लेखी निवेदन सादर करण्यात आले आहे. आंदोलकांनी इशारा दिला आहे की, जर १५ ऑक्टोबर २०२६ पर्यंत त्यांच्या मागण्यांवर सकारात्मक लेखी निर्णय घेतला नाही, तर ते शुक्रवार, १६ ऑक्टोबर रोजी सकाळी १० वाजल्यापासून वीज केंद्राच्या मुख्य प्रवेशद्वारावर अनिश्चित काळासाठी उपोषण सुरू करतील.
उल्हास पगारे, रवी सापकाळे, उल्हास बोरोले, मयूर पाटील, आशिष पटेल, पवन अग्रवाल, पप्पू जाकातदार, अजय भैसे आणि निखिल बेडमुथा यांच्यासह इतर व्यावसायिक बैठकीदरम्यान उपस्थित होते.
