शहरात खळबळ – नगरसेवकाच्या अंगावर धावून जात जीवे मारण्याची धमकी; गुन्हा दाखल
जळगाव खान्देश लाईव्ह न्यूज नेटवर्क – महानगरपालिकेच्या निवडणुकीचा निकाल जाहीर झाल्यानंतर शहरात राजकीय वातावरण तापले असून, नवनिर्वाचित नगरसेवकाला जीवे मारण्याची धमकी दिल्याची धक्कादायक घटना शनिवारी १७ जानेवारी रोजी मध्यरात्री १२.३० वाजता ओंकार नगर परिसरात हा प्रकार घडला. याप्रकरणी सोमवारी १९ जानेवारी रोजी रात्री १० वाजता जिल्हापेठ पोलीस ठाण्यात दोन जणांविरुद्ध गुन्हा दाखल करण्यात आला आहे.
याबाबत सविस्तर वृत्तांत असे की, फिर्यादी विष्णू रामदास भंगाळे (वय ५५, रा. ओंकार नगर, जळगाव) हे नुकत्याच पार पडलेल्या महानगरपालिका निवडणुकीत नगरसेवक म्हणून निवडून आले आहेत. १६ जानेवारी रोजी मतदान प्रक्रिया पार पडल्यानंतर, मध्यरात्री १२:३० वाजेच्या सुमारास विष्णू भंगाळे हे आपल्या घराशेजारील प्लॉटजवळ सहकारी वसंत सोनवणे आणि सागर पाटील यांच्याशी चर्चा करत उभे होते. त्यावेळी मोटारसायकलवरून आलेल्या प्रशांत चौधरी आणि त्याच्यासोबत असलेल्या एका अनोळखी इसमाने भंगाळे यांच्याजवळ येऊन वाद उकरून काढला. “आमचा उमेदवार निवडणुकीत पडला आहे,” असे म्हणत आरोपीने नगरसेवक भंगाळे यांना अत्यंत अश्लील भाषेत शिवीगाळ करण्यास सुरुवात केली. एवढ्यावरच न थांबता, “तुला बघून घेतो, तुमची रक्ताची होळी करू” अशी जाहीर धमकी देऊन आरोपी तिथून पसार झाले. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे. पुढील तपास पोलीस कर्मचारी करीत आहे.
