धक्कादायक : प्राचार्यांच्या जाचाला कंटाळून फार्मसी विद्यार्थ्याची आत्महत्या; सुसाईड नोटमध्ये गंभीर आरोप
जळगाव प्रतिनिधी । शिक्षकाच्या मारहाणीमुळे आणि सार्वजनिक अपमानामुळे एका तरुण विद्यार्थ्याने आपली जीवनयात्रा संपवल्याची हृदयद्रावक घटना जळगाव शहरात घडली आहे. येथील देवकर कॉलेज ऑफ फार्मसीमध्ये द्वितीय वर्षात शिकणाऱ्या १९ वर्षीय श्याम प्रभाकर पाटील याने रविवारी, १५ फेब्रुवारी रोजी संध्याकाळी नेहरू नगर येथील आपल्या भाड्याच्या खोलीत गळफास घेऊन आत्महत्या केली. या घटनेनंतर परिसरात एकच खळबळ उडाली असून, मृत विद्यार्थ्याच्या खिशात सापडलेल्या सुसाईड नोटमुळे महाविद्यालयाचे प्राचार्य योगेश पवार वादाच्या भोवऱ्यात सापडले आहेत.
नेमकी घटना काय?
मूळचा बोदवड येथील रहिवासी असलेला श्याम पाटील हा एका शेतकरी कुटुंबातील मुलगा होता. शिक्षणासाठी तो जळगावात भाड्याच्या खोलीत राहत होता. रविवारी त्याचे रूममेट गावी गेलेले असल्याने तो खोलीवर एकटाच होता. याच संधीचा फायदा घेत संध्याकाळी ६ वाजेच्या सुमारास त्याने टोकाचे पाऊल उचलले. त्याच्या आत्महत्येची माहिती मिळताच पोलिसांनी घटनास्थळी धाव घेतली असता, झडतीमध्ये एक चिठ्ठी (सुसाईड नोट) सापडली.
सुसाईड नोटमधील धक्कादायक खुलासा
श्यामने मृत्यूपूर्वी लिहिलेल्या चिठ्ठीत आपल्या वेदना मांडल्या आहेत. “माझी कोणतीही चूक नसताना प्राचार्यांनी मला सर्व शिक्षक आणि मित्रांसमोर अपमानित केले. मित्रांच्या भांडणात मध्यस्थी करायला गेलो असताना, दुसऱ्या मुलाची चूक असतानाही प्राचार्यांनी मला पीव्हीसी पाईपने मारहाण केली आणि शिवीगाळ केली. गुरु मारतात हे मला माहीत आहे, पण इतकेही नाही मारत,” असे त्याने नमूद केले आहे. त्याने पत्राच्या शेवटी आपल्या ‘रामू’ नावाच्या मित्राला “माझी स्टोरी इन्स्टावर टाक” असे भावूक आवाहनही केले आहे.
पालकांचा आक्रमक पवित्रा
या घटनेची माहिती समजताच जळगाव शासकीय रुग्णालयात नातेवाईकांनी मोठी गर्दी केली होती. “जोपर्यंत प्राचार्य योगेश पवार आणि संबंधित दोषींवर गुन्हा दाखल करून त्यांना अटक केली जात नाही, तोपर्यंत मृतदेह ताब्यात घेणार नाही,” अशी ठाम भूमिका श्यामच्या पालकांनी घेतली आहे. यामुळे काही काळ रुग्णालयात तणावाचे वातावरण निर्माण झाले होते.
पोलीस तपास सुरू
सध्या रामानंदनगर पोलीस स्टेशनमध्ये अकस्मात मृत्यूची नोंद करण्यात आली आहे. पोलिसांनी सुसाईड नोट जप्त केली असून, पोलीस हवालदार अजित पाटील या प्रकरणाचा पुढील तपास करत आहेत. एका हुशार विद्यार्थ्याच्या अशा दुर्दैवी अंतमुळे विद्यार्थी वर्गात तीव्र संताप व्यक्त केला जात आहे.
