वरणगावच्या मल्लांना राज्यस्तरीय कुस्ती पंच म्हणून ऐतिहासिक संधी
भुसावळ खानदेश लाईव्ह न्युज प्रतिनिधी दि 2
वरणगाव येथील हनुमान व्यायाम शाळाच्या मल्ल संजय बावस्कर आणि दिलीप संगेले यांना नुकत्याच पुणे जिल्ह्यातील वाघोली येथे आयोजित महाराष्ट्र राज्य कुस्तीगीर परिषदेच्या राज्यस्तरीय कुस्ती स्पर्धेत राज्यस्तरीय पंच म्हणून ऐतिहासिक संधी मिळाली.
राज्यभरातील कुस्ती सामन्यांमध्ये पंच मंडळ आणि तांत्रिक सहाय्यकांची नेमणूक केली जाते. या स्पर्धेत संजय आणि दिलीप यांनी आपल्या जबाबदारीची उत्कृष्ट पूर्तता केली आणि पंच म्हणून काम करताना कौशल्य आणि प्रामाणिकपणाचे प्रदर्शन केले. त्यांच्या कामगिरीसाठी त्यांचा सन्मानदेखील करण्यात आला.
भुसावळ तालुक्यात आतापर्यंत कुणालाच राज्यस्तरीय पंच म्हणून निवड मिळालेली नव्हती. या वर्षी पहिल्यांदा तालुक्यातील दोघा मल्लांना अशी संधी मिळाल्यामुळे हनुमान व्यायाम शाळा आणि तालुका कुस्तीगीर संघाने त्यांचा विशेष सत्कार केला.
संजय बावस्कर आणि दिलीप संगेले यांची ही निवड केवळ त्यांचा नाही तर संपूर्ण स्थानिक कुस्ती क्षेत्राचा गौरव आहे. तज्ज्ञांच्या मते, यामुळे भविष्यात या क्षेत्रातील युवकांमध्ये कुस्तीप्रती उत्साह आणि प्रोत्साहन वाढेल, आणि स्थानिक कुस्तीला नवीन उंचीवर नेण्यास मदत होईल.
