पावसाच्या प्रतीक्षेत शेतकरी; पेरण्या रखडल्याने चिंता वाढली
वेळेत पाऊस न झाल्यास खरीप हंगामासह अर्थकारणावरही परिणाम होण्याची भीती
जळगाव : खानदेश लाईव्ह न्युज प्रतिनिधी जून महिना संपत आला तरी जिल्ह्यात समाधानकारक पाऊस न झाल्याने खरीप हंगामाच्या पेरण्या खोळंबल्या असून शेतकऱ्यांची चिंता वाढली आहे. शेतांची मशागत आणि इतर पूर्वतयारी पूर्ण करूनही पावसाअभावी अनेक शेतकरी पेरणीबाबत संभ्रमात आहेत. त्यामुळे सध्या सर्वांचेच लक्ष आकाशाकडे लागले आहे.
खरीप हंगामासाठी शेतकरी एप्रिल महिन्यापासूनच शेताची मशागत, नांगरणी, कुळवणी तसेच इतर आवश्यक कामे पूर्ण करून ठेवतो. मात्र यंदा अपेक्षित पाऊस न झाल्याने या सर्व तयारीनंतरही पेरण्यांना सुरुवात करता आलेली नाही. काही भागांत हलक्या सरी कोसळल्या असल्या तरी व्यापक स्वरूपाचा पाऊस अद्याप झालेला नाही.
पारंपरिकदृष्ट्या मृग नक्षत्रात पेरणीयोग्य पाऊस पडण्याची अपेक्षा असते. मात्र यंदा मृग नक्षत्रातही समाधानकारक पाऊस न झाल्याने शेतकऱ्यांच्या चिंतेत भर पडली आहे. आता आर्द्रा नक्षत्र सुरू झाले असून, या कालावधीत चांगला पाऊस झाल्यास खरीप हंगामाला दिलासा मिळू शकतो. अन्यथा पेरण्या आणखी लांबणीवर जाण्याची शक्यता आहे.
ज्या शेतकऱ्यांकडे विहीर, बोअरवेल किंवा अन्य सिंचनाची सुविधा उपलब्ध आहे, त्यांनी मर्यादित प्रमाणात पेरणी सुरू केली आहे. मात्र कोरडवाहू क्षेत्रातील शेतकरी पूर्णपणे पावसावर अवलंबून असल्याने त्यांच्यासमोर मोठे आव्हान निर्माण झाले आहे.
दरम्यान, हवामानातील बदलांमुळे यंदा मान्सूनच्या आगमनात विलंब होत असल्याचे चित्र दिसून येत आहे. वाढत्या उष्णतेमुळे सर्वसामान्य नागरिकही त्रस्त झाले असून, अनेक भागांमध्ये पाणीटंचाईची समस्या जाणवू लागली आहे.
उपलब्ध जलसाठ्याचा विचार करून राज्य शासन आणि जिल्हा प्रशासनाने धरणांमधील पाणी प्रामुख्याने पिण्यासाठी राखीव ठेवण्याचा निर्णय घेतला आहे. त्यामुळे शेतीसाठी अतिरिक्त पाणीपुरवठा होण्याची शक्यता कमी असल्याचे स्पष्ट करण्यात आले आहे.यामुळे पुढील काही दिवस शेतकऱ्यांसाठी अत्यंत महत्त्वाचे ठरणार आहेत. वेळेत आणि पुरेसा पाऊस झाल्यास खरीप हंगामाला दिलासा मिळू शकतो; मात्र पावसाने आणखी दडी मारल्यास उत्पादनावर परिणाम होऊन शेतकऱ्यांसमोर मोठे आर्थिक संकट उभे राहण्याची भीती व्यक्त केली जात आहे.
