जळगावहून मुंबईला अवघ्या पाच तासांत पोहोचणे शक्य!
‘खान्देश द्रुतगती महामार्ग’ प्रकल्पाला गती; समृद्धी महामार्गाशी थेट जोडणीचा मार्ग मोकळा
जळगाव | खानदेश लाईव्ह न्युज प्रतिनिधी
खान्देशच्या विकासाला नवे बळ
उत्तर महाराष्ट्राच्या वाहतूक, उद्योग आणि आर्थिक विकासाला चालना देणारा जळगाव ते छत्रपती संभाजीनगर द्रुतगती महामार्ग अर्थात ‘खान्देश महामार्ग’ प्रकल्प प्रत्यक्षात येण्याच्या दिशेने महत्त्वाचे पाऊल पडले आहे. महाराष्ट्र राज्य रस्ते विकास महामंडळाने (एमएसआरडीसी) नागपूर-मुंबई समृद्धी महामार्गाचा विस्तार जळगावपर्यंत करण्याचा निर्णय घेतल्याने जळगावसह संपूर्ण खान्देशाला थेट समृद्धी महामार्गाची जोडणी मिळणार आहे.
प्राथमिक आराखडा तयार करण्याचे काम सुरू
सुमारे १०५ किलोमीटर लांबीच्या या द्रुतगती महामार्गासाठी प्राथमिक आराखडा तयार करण्याचे काम सध्या सुरू आहे. प्रस्तावित मार्ग, जमीन संपादन, पर्यावरणीय बाबी, वाहतुकीची संभाव्य घनता आणि प्रकल्प खर्चाचा अभ्यास विविध स्तरांवर करण्यात येत आहे. आराखडा पूर्ण झाल्यानंतर सविस्तर प्रकल्प अहवाल राज्य शासनाकडे मंजुरीसाठी सादर केला जाणार आहे.
जळगाव-छत्रपती संभाजीनगर प्रवास अवघ्या एका तासात
सध्या जळगाव ते छत्रपती संभाजीनगर प्रवासासाठी सुमारे तीन तास लागतात. मात्र द्रुतगती महामार्ग पूर्ण झाल्यानंतर हे अंतर अवघ्या एका तासात पार करता येण्याची शक्यता व्यक्त करण्यात येत आहे. तसेच जळगाव ते मुंबई दरम्यानचा सात ते आठ तासांचा प्रवास सुमारे पाच तासांपर्यंत कमी होऊ शकतो.
कृषी क्षेत्राला होणार मोठा फायदा
केळी उत्पादनासाठी प्रसिद्ध असलेल्या जळगाव जिल्ह्यात कापूस, मका, डाळी आणि इतर कृषी उत्पादनांची मोठ्या प्रमाणात निर्मिती होते. द्रुतगती महामार्गामुळे कृषी मालाची वाहतूक जलद आणि कमी खर्चात होणार असल्याने शेतकऱ्यांना बाजारपेठांपर्यंत पोहोचणे अधिक सुलभ होणार आहे. त्यामुळे कृषी उत्पादनांना अधिक चांगला बाजारभाव मिळण्याची शक्यता आहे.
उद्योग आणि रोजगाराला मिळणार चालना
जळगाव, भुसावळ, चाळीसगाव आणि परिसरातील औद्योगिक क्षेत्रांना या महामार्गाचा मोठा लाभ होणार आहे. मालवाहतूक खर्चात बचत झाल्याने उद्योगांची स्पर्धात्मक क्षमता वाढेल. यासोबतच नवीन गुंतवणूक, औद्योगिक प्रकल्प आणि रोजगारनिर्मितीला चालना मिळण्याची अपेक्षा व्यक्त केली जात आहे.
पर्यटन क्षेत्रासाठीही ठरणार वरदान
अजिंठा-वेरूळ लेणी, पाटणादेवी, गौताळा अभयारण्य, मुक्ताईनगर परिसरातील धार्मिक स्थळे आणि खान्देशातील विविध पर्यटनस्थळांपर्यंत पर्यटकांना अधिक जलद व सुरक्षित प्रवास करता येणार आहे. त्यामुळे पर्यटन व्यवसायालाही मोठी चालना मिळण्याची शक्यता आहे.
पुणे आणि नागपूरही येणार जवळ
समृद्धी महामार्गाशी थेट जोडणी झाल्यानंतर जळगाव ते पुणे आणि जळगाव ते नागपूर या प्रवासाच्या वेळेतही लक्षणीय घट होणार आहे. त्यामुळे राज्यातील प्रमुख शहरांमधील व्यापार, उद्योग आणि आर्थिक देवाणघेवाण अधिक गतिमान होण्यास मदत मिळणार आहे.
प्रकल्पाबाबत वाढल्या अपेक्षा
सध्या प्रकल्पाची प्राथमिक प्रक्रिया सुरू असून राज्य शासनाची अंतिम मंजुरी मिळाल्यानंतर प्रत्यक्ष कामाला सुरुवात होणार आहे. त्यामुळे खान्देशवासीयांच्या अपेक्षा वाढल्या असून हा महामार्ग उत्तर महाराष्ट्राच्या विकासाचा नवा अध्याय ठरेल, अशी आशा व्यक्त केली जात आहे.
कोट
जळगाव-छत्रपती संभाजीनगर द्रुतगती महामार्गामुळे उत्तर महाराष्ट्राच्या विकासाला मोठी गती मिळेल. समृद्धी महामार्गाशी जोडणी झाल्याने वाहतूक, उद्योग, कृषी आणि पर्यटन क्षेत्राला दीर्घकालीन लाभ होणार असून हा प्रकल्प खान्देशच्या प्रगतीसाठी महत्त्वाचा टप्पा ठरेल.”
प्रकल्पाशी संबंधित सूत्रे
