यावलमध्ये छत्रपती शिवाजी महाराजांच्या पुतळ्याच्या जागेवर अखेर सर्वानुमते शिक्कामोर्तब.

विरोधी गटाचा टी-पॉईंटवरील पुतळ्याचा आग्रह ; चर्चेनंतर डॉ. ए.पी.जे. अब्दुल कलाम व्यापारी संकुलासमोरील जागेला मंजुरी

यावल खान्देश लाईव्ह न्यूज नेटवर्क – यावल शहरात हिंदवी स्वराज्याचे संस्थापक छत्रपती शिवाजी महाराज यांचा पुतळा उभारण्याच्या जागेवरून सोमवारी, दि. २६ ऑक्टोबर २०२६ रोजी नगरपालिकेच्या सभागृहात झालेल्या नगरसेवकांच्या सभेत महत्त्वपूर्ण चर्चा झाली. सत्ताधारी गटाने निश्चित केलेल्या जागेबाबत विरोधी गटातील नगरसेवक राकेश कोलते व त्यांच्या सहकारी सदस्यांनी प्रारंभी भूमिका मांडत भुसावळ रोडवरील टी-पॉईंट येथे पुतळा उभारण्याची जोरदार मागणी केली.

मात्र, जागेच्या व्यवहार्यतेसह आवश्यक शासकीय परवानग्यांचा मुद्दा समोर आल्यानंतर आणि यावलकरांच्या भावनांचा विचार करून अखेरीस डॉ. ए.पी.जे. अब्दुल कलाम व्यापारी संकुलासमोरील निश्चित जागेवर पुतळा उभारण्याचा विषय सभेत सर्वानुमते मंजूर करण्यात आला.प्रभारी मुख्याधिकारी अभिजीत बाविस्कर यांच्या उपस्थितीत झालेल्या या सभेतील चर्चेमुळे म्हणजे सभा सुरू असताना सभेतील विषय प्रसिद्धी माध्यमातून प्रसिद्ध झाल्याने शहरात आणि काही न.पा. सदस्यांमध्ये काही काळ संभ्रमाचे वातावरण निर्माण झाले होते. तथापि, चर्चेअंती पुतळा उभारण्यास विरोध नसल्याची भूमिका विरोधी गटाकडून स्पष्ट करण्यात आली आणि जागेबाबत सहमती निर्माण झाली.

सभेतील चर्चा सोशल मीडियावर

शहरात संभ्रमाचे वातावरण नगरपालिकेच्या सभागृहात छत्रपती शिवाजी महाराजांच्या पुतळ्याच्या जागेबाबत चर्चा सुरू असतानाच सभेतील विषय सोशल मीडियावर प्रसारित झाल्याने यावल शहरात त्याची चर्चा सुरू झाली. जागेच्या निवडीवरून उपस्थित झालेल्या मतभेदांचा अर्थ पुतळा उभारण्यालाच विरोध होत असल्याचा चुकीचा संदेश काही नागरिकांपर्यंत पोहोचल्याची बाब समोर आली.छत्रपती शिवाजी महाराज हे महाराष्ट्राचे आराध्य दैवत असल्याने त्यांच्या पुतळ्याच्या उभारणीचा विषय नागरिकांच्या भावनांशी निगडित आहे.त्यामुळे या विषयावरून शहरात गैरसमज निर्माण होण्याची शक्यता लक्षात घेऊन सभागृहात दोन्ही गटांमध्ये चर्चा झाली.या चर्चेदरम्यान नगरसेवक राकेश कोलते यांनी छत्रपती शिवाजी महाराजांचा पुतळा उभारण्यास आमचा विरोध नसल्याचे स्पष्ट केले.पुतळा नेमक्या कोणत्या ठिकाणी उभारावा याबाबतच आपली भूमिका असल्याचे त्यांच्या स्पष्टीकरणातून स्पष्ट झाले.

टी-पॉईंट की व्यापारी संकुलासमोरील जागा… परवानग्यांचा मुद्दा ठरला महत्त्वाचा

विरोधी गटातील नगरसेवक राकेश कोलते व त्यांच्या सहकारी सदस्यांनी भुसावळ रोडवरील टी-पॉईंट येथे छत्रपती शिवाजी महाराजांचा पुतळा उभारण्याची मागणी केली होती. मात्र,या जागेच्या संदर्भात राष्ट्रीय महामार्ग प्राधिकरणासह संबंधित शासकीय कार्यालयांच्या आवश्यक परवानग्या घ्याव्या लागण्याचा मुद्दा चर्चेत आला.यावेळी माजी नगराध्यक्ष तथा विद्यमान नगरसेवक अतुल पाटील यांनी जागेच्या मालकीसह परवानगी प्रक्रियेबाबत वस्तुस्थिती सभागृहाच्या निदर्शनास आणून दिली.डॉ.ए.पी.जे.अब्दुल कलाम व्यापारी संकुलासमोरील जागा नगरपरिषदेच्या मालकीची असल्याने तेथे पुतळा उभारण्याच्या प्रस्तावाचा विचार करणे अधिक व्यवहार्य ठरू शकते,अशी भूमिका त्यांनी मांडली.त्याउलट भुसावळ रोडवरील टी-पॉईंट येथे पुतळा उभारण्याचा निर्णय घेतल्यास राष्ट्रीय महामार्ग प्राधिकरणासह इतर संबंधित कार्यालयांच्या आवश्यक परवानग्या घेण्याची प्रक्रिया करावी लागू शकते,हा मुद्दाही चर्चेत आला.त्यामुळे जागेची उपलब्धता परवानगी प्रक्रिया आणि भविष्यातील अडचणी या बाबींचा विचार करून निर्णय घेण्याची गरज अधोरेखित झाली.

अखेर सर्वानुमते निर्णय–डॉ. कलाम व्यापारी संकुलासमोरच पुतळा उभारणार

सभागृहात सत्ताधारी आणि विरोधी गटांमध्ये चर्चा झाल्यानंतर छत्रपती शिवाजी महाराजांच्या पुतळ्याच्या जागेबाबत सहमती निर्माण झाली.यावलकरांच्या भावना, जागेची मालकी आणि आवश्यक परवानग्यांचा विचार करून डॉ. ए.पी.जे.अब्दुल कलाम व्यापारी संकुलासमोरील निश्चित जागेवर पुतळा उभारण्याचा प्रस्ताव सर्वानुमते मंजूर करण्यात आला.या निर्णयामुळे जागेवरून निर्माण झालेला मतभेद चर्चेच्या माध्यमातून दूर झाल्याचे चित्र दिसून आले. पुतळा उभारण्याच्या मूळ उद्देशाबाबत दोन्ही गटांमध्ये एकमत असल्याचेही या चर्चेतून स्पष्ट झाले.याच सभेत पुतळ्याच्या जागेबाबतच्या विषयासह इतर सर्व विषयही सर्वानुमते मंजूर करण्यात आले.

यावलकरांच्या भावनांचा आदर राखणे महत्त्वाचे

छत्रपती शिवाजी महाराजांचा पुतळा उभारणे हा केवळ जागेच्या निवडीपुरता मर्यादित विषय नसून तो यावल शहराच्या अस्मितेशी आणि नागरिकांच्या भावनांशी संबंधित आहे. त्यामुळे अशा विषयावर चर्चा करताना वस्तुस्थिती समजून घेणे, सभेतील निर्णय अधिकृतपणे स्पष्ट करणे आणि सोशल मीडियावरील अपुऱ्या माहितीमुळे गैरसमज पसरू न देणे महत्त्वाचे ठरते.यावल नगरपालिकेच्या सभेत अखेरीस सर्वानुमते निर्णय झाल्याने या विषयावरील संभ्रम दूर होण्यास मदत होण्याची अपेक्षा आहे.आता पुतळा उभारणीच्या पुढील प्रक्रियेला गती मिळेल याकडे यावलकरांचे लक्ष लागले आहे. जागेच्या निवडीवर मतभेद असले तरी पुतळा उभारण्यास विरोध नसल्याचे विरोधी गटाकडून स्पष्ट करण्यात आले आणि चर्चेअंती डॉ. ए.पी.जे. अब्दुल कलाम व्यापारी संकुलासमोरील जागेच्या प्रस्तावाला सर्वानुमते मंजुरी मिळाली, हे या सभेचे प्रमुख वैशिष्ट्य ठरले.